Partia “Fjala”, aksion simbolik kundër vizitës së Vuçiqit 

Partia “Fjala” ka mbajtur një aksion simbolik para ndërtesës së Qeverisë, gjatë të cilit kanë vendosur pako me pelena, dedikuar liderëve politikë. 

Përmes këtij aksioni, ata kanë njoftuar që po e shprehin pakënaqësinë e tyre lidhur me vizitën e presidentit të Serbisë, Aleksandër Vuçiq, në Kosovë dhe reagimin e institucioneve të Kosovës ndaj kësaj vizite. 

Anëtari i kryesisë së kësaj partie, Xhevdet Maloku, tha se guximi i Vuçiqit për të folur rreth Ujmanit dhe Trepçës është pasojë e politikës në vend.

Maloku tha se ata e dënojnë ashpër fjalorin e Vuçiqit dhe tregoi se këto pelena u dedikohen liderëve politikë, që sipas tij, janë treguar të frikësuar ndaj kësaj vizite.

Ndërsa, anëtari tjetër i kësaj partie, Avni Çakmaku, ka thënë se vizita e Vuçiqit ka treguar se kush e ka pushtetin në veri të Kosovës. 

Drejtuesit e partisë Fjala thanë se kanë qenë kategorikisht kundër vizitës së Vuçiqit në Kosovë, por jo edhe kundër vazhdimit të bisedimeve.

---