Parlamenti nuk pranon ndalimin e reklamave për duhanin

Për shumicën e deputetëve, ky kufizim do të binte në kundërshtim të madh me parimet e tregut të lirë dhe njëkohësisht do të rriste burokracinë

Keystone

Dhoma Nacionale ashtu sikurse edhe ajo e Kantoneve më parë, e ka hedhur poshtë ligjin e ri federal për prodhimet e duhanit. Atë ia ka kthyer për rishikim Këshillit Federal.

Ligji në fjalë parashihte veç tjerash një ndalim më të theksuar se që është deri tash, të reklamimit të produkteve të duhanit, bën të ditur srf.ch. Ndërsa për shumicën e deputetëve, ky kufizim do të binte në kundërshtim të madh me parimet e tregut të lirë dhe njëkohësisht do të rriste burokracinë.

Një pakicë deputetësh e përbërë nga subjektet e majta ka konstatuar se shpenzimet që i shkaktohen shëndetësisë nga abuzimi me duhanin janë tepër të larta, transmeton albinfo.ch. Për këtë arsye, sipas tyre, kundërshtimi i ligjit për duhanin është një gjunjëzim para lobit të prodhuesve të duhanit.

Me ligjin tashmë të hedhur poshtë nga parlamenti, qeveria synonte që të parandalonte konsumimin e duhanit nga të rinjtë. Këtë do ta bënte përmes ndalimit në nivel vendi të shitjes së cigareve personave të mitur dhe përmes ndalimit të reklamimit të duhanit.