Parlamenti Evropian ndihmon Ukrainën me 1.2 miliardë euro

Gjatë seancës plenare në Strasburg, Parlamenti Evropian miratoi një kredi makrofinanciare prej 1.2 miliardë euro për Ukrainën

“Rezoluta, e miratuar me procedurë urgjente, kaloi me 598 vota pro, 55 kundër dhe 41 abstenime”, bëhet e ditur në njoftimin për shtyp të Parlamentit Evropian.

Vendimi për të ofruar ndihmë makro-financiare për Ukrainën duhet të merret edhe në nivel të Këshillit të BE-së përpara se të hyjë në fuqi.

Më 11 shkurt Komiteti i Përfaqësuesve të Përhershëm (COREPER) mbështeti propozimin e Komisionit Evropian për të ofruar një ndihmë shtesë makro-financiare urgjente për Ukrainën në shumën prej 1.2 miliardë eurosh.

BE-ja do të ofrojë një ndihmë të re makro-financiare urgjente për Ukrainën në përgjigje të tensioneve gjeopolitike në gjithë vendin, të cilat kanë pasur një efekt të dëmshëm në ekonominë dhe stabilitetin financiar të saj.

---