Paralajmërim në Zvicër: “Jo ndaj 10 milionëve” mund të sjellë bllokim masiv trafiku

Ekspertët paralajmërojnë se rajonet kufitare, sidomos Gjeneva, mund të preken më rëndë, pasi mijëra punëtorë nga Franca kalojnë çdo ditë kufirin për të punuar në Zvicër

Ekspertët paralajmërojnë se miratimi i referendumit “Jo ndaj Zvicrës me 10 milionë banorë” mund të shkaktojë kaos në trafik dhe bllokime të mëdha në kufijtë zviceranë.

Sipas një studimi të publikuar së fundmi, nëse iniciativa kundër emigracionit miratohet në referendumin e 14 qershorit, Zvicra mund të detyrohet të largohet nga zona Schengen dhe të kufizojë lëvizjen e lirë me Bashkimin Evropian. Kjo do të sillte kontrolle më të forta kufitare dhe pritje të gjata në pikat hyrëse, shkruan The Local, transmeton albinfo.ch.

Ekspertët paralajmërojnë se rajonet kufitare, sidomos Gjeneva, mund të preken më rëndë, pasi mijëra punëtorë nga Franca kalojnë çdo ditë kufirin për të punuar në Zvicër. Vetëm në Gjenevë, mbi 114 mijë punëtorë ndërkufitarë udhëtojnë çdo ditë drejt kantonit.

Mbështetësit e iniciativës argumentojnë se emigracioni i lartë po shkakton krizë banesash, mbingarkesë të transportit publik dhe presion mbi shërbimet publike. Ndërsa kundërshtarët paralajmërojnë se kufizimi i emigracionit mund të dëmtojë ekonominë dhe të krijojë mungesë të fuqisë punëtore.

Referendumi i 14 qershorit konsiderohet një nga votimet më të rëndësishme politike në Zvicër vitet e fundit, ndërsa shumë analistë po e krahasojnë atë me Brexit-in britanik për shkak të ndikimit të mundshëm në marrëdhëniet me BE-në.

---