Osmani dhe Abdixhiku pas aktgjykimit në Hagë: UÇK-ja mbetet pjesë e rëndësishme e historisë

Ish-presidentja Vjosa Osmani dhe kryetari i LDK-së, Lumir Abdixhiku, kanë reaguar pas shpalljes së aktgjykimit ndaj ish-krerëve të UÇK-së në Hagë, duke theksuar se lufta e UÇK-së, sipas tyre, mbetet pjesë e rëndësishme e historisë së Kosovës.

Ish-presidentja e Kosovës, Vjosa Osmani, ka reaguar pas shpalljes së aktgjykimit ndaj ish-krerëve të Ushtrisë Çlirimtare të Kosovës në Hagë. Në reagimin e saj, ajo ka theksuar rëndësinë që, sipas saj, lufta çlirimtare ka në historinë moderne të Kosovës, raporton albinfo.ch.

“UÇK-ja mbetet pjesa më krenare e historisë moderne të popullit tonë: dje, sot e përjetësisht!”, ka shkruar Osmani.

Ajo ka përmendur edhe viktimat e luftës në Kosovë, duke deklaruar se mbi 13 mijë njerëz janë vrarë gjatë luftës dhe se rreth 10 mijë prej tyre ishin civilë. Osmani ka theksuar gjithashtu se më shumë se 1 mijë e 500 persona vazhdojnë të figurojnë të zhdukur.

Në reagimin e saj, ish-presidentja ka përmendur edhe dhunën seksuale, torturat, vrasjen e fëmijëve dhe krime të tjera të kryera gjatë luftës, duke kritikuar Serbinë për mohimin e krimeve dhe për mungesën, sipas saj, të drejtësisë për viktimat.

Osmani ka thënë se populli i Kosovës u ngrit kundër këtyre krimeve dhe e ka cilësuar UÇK-në si “ushtrinë e popullit të Kosovës”.

“Sot e përgjithmonë, do ta mbrojmë drejtësinë e luftës sonë çlirimtare”, ka deklaruar ajo, duke e përmbyllur reagimin me mesazhin se shteti i pavarur dhe sovran i Kosovës është amanet i përbashkët.

Reagim ka bërë edhe kryetari i Lidhjes Demokratike të Kosovës, Lumir Abdixhiku. Ai ka thënë se pjesëtarët e UÇK-së “mbrojtën pragun e shtëpisë”, duke e cilësuar luftën e saj si pjesë të rëndësishme të historisë moderne të Kosovës.

“Djemtë e vajzat e Ushtrisë Çlirimtare të Kosovës mbrojtën pragun e shtëpisë. UÇK-ja mbetet pjesa më krenare e historisë moderne të popullit tonë; dje, sot e përjetësisht”, ka shkruar Abdixhiku.

Abdixhiku ka deklaruar gjithashtu se, sipas tij, asnjë aktgjykim nuk mund ta ndryshojë të vërtetën historike për luftën në Kosovë.

Reagimet e tyre vijnë pas shpalljes së aktgjykimit të shkallës së parë ndaj Hashim Thaçit, Kadri Veselit, Jakup Krasniqit dhe Rexhep Selimit në Dhomat e Specializuara të Kosovës në Hagë./Albinfo.ch

---