Opozita organizohet për seancë të jashtëzakonshme të Kuvendit

Opozita është organizuar me qëllimin për ta ndalur përpjekjen e presidentit Hashim Thaçi, e cila prek direkt kufijtë e Kosovës

Shef i grupit parlamentar të VV-së, Glauk Konjufca, ka njoftuar se sot gjatë ditës opozita do të mblidhet në një takim për ta finalizuar formën e dokumentit apo rezolutës, të cilën do ta prezantojë në seancën e jashtëzakonshme, e cila pritet të mbahet para datës 7 shtator.

Opozita është organizuar me qëllimin për ta ndalur përpjekjen e presidentit Hashim Thaçi, e cila prek direkt kufijtë e Kosovës.

“Më mirë është që ne të gjithë si popull të vendosim për Thaçin, sesa ai për të gjithë ne. Ne u pajtuam që para se ai të shkojë në Bruksel më 7 shtator, duhet të mblidhemi dhe t’i tregojmë se kjo është e pamundshme. Kuvendi të dalë me një dokument që do t’i tregojë atij se është e pamundshme që ai t’i vërë në pazar kufijtë e Kosovës”, tha Konjufca në Interaktiv të KTV-së. Konjofuca thotë se rezoluta e propozuar nga partitë opozitare do t’i ketë disa parime që janë etike për Kosovën dhe të cilat nuk do të guxonte t’i shkelte askush. “Nëse Thaçi shpërfill Kuvendin, protestat popullore janë të pashmangshme”, ka përfunduar ai, përcjell albinfo.ch.

Veseli e quan ‘veprim absurd’ iniciativën e opozitës

Kryetari i Kuvendit të Kosovës, Kadri Veseli, e ka quajtur ‘veprim politikisht absurd’ iniciativën e opozitës për seancë të jashtëzakonshme rreth sovranitetit dhe integritetit territorial.

Ai i ka quajtur të turpshme dhe gënjeshtra deklaratat e opozitës, e njëkohësisht edhe të rrezikshme për stabilitetin e vendit. “Ato kanë një qëllim të vetëm: të nxisin tensione dhe më pas protesta të dhunshme antidemokratike, në kundërshtim me rendin kushtetues dhe ligjor në vend. Në rast se janë kundër dialogut dhe me dezinformata qëllimkëqija duan t’i manipulojnë qytetarët, duke u thënë se gjoja shteti dhe territori i Kosovës është në rrezik, le të flenë rehat, sepse institucionet shtetërore janë në krye të detyrave kushtetuese”, ka thënë Veseli.

Kryeparlamentari Veseli ka shkruar se vendi nuk negocion për shtetësinë, sovranitetin dhe integritetin e saj territorial.

---