Nxënësit e mësimit plotësues të gjuhës shqipe vizitojnë Konsullatën në Cyrih

Ata u pritën nga udhëheqësi i misionit, Sami Kastrati

Rreth shtatëmbëdhjetë nxënës shqiptarë nga Kosova, të cilët ndjekin mësimin plotësues të gjuhës shqipe në Kantonin e Cyrihut, të shoqëruar nga kryetari i Lidhjes së Arsimtarëve dhe Prindërve Shqiptarë për Kantonin e Cyrihut, Naser Ulaj, kanë vizituar Konsullatën e Republikës së Kosovës në Cyrih.

Në kuadër të kësaj vizite ata u pritën në ambientet e Konsullatës nga Udhëheqësi i Misionit Konsullor të Republikës së Kosovës, Sami Kastrati, dhe i gjithë stafi i Konsullatës, ku edhe u njohën për së afërmi me punën dhe aktivitetet e Misionit Konsullor të Republikës së Kosovës në Cyrih.

‘’Ne ishim shumë të lumtur që të presim në takim nxënësit shqiptarë nga Kosova, të cilët ndjekin mësimin plotësues të gjuhës shqipe në Kantonin e Cyrihut. Dëgjuam rrëfime emocionuese për atdhedashurinë dhe për ëndrrat e tyre në të ardhmen. Ne, dëshirojmë që ky numër i nxënësve të rritet në vazhdimësi dhe i inkurajojmë prindërit e nxënësve që t’i dërgojnë fëmijët e tyre për mësimin plotësues të gjuhës shqipe’’, ka thënë udhëheqësi i Misionit Konsullor, Sami Kastrati.

---

LAJME INTERESANTE NGA INTERNETI