Një shtetas i Kosovës humbi jetën nga përmbytjet në Gjermani

Mbi 160 njerëz kanë humbur jetën, ndërsa mbi 150 mbeten të zhdukur

Një shtetas i Kosovës ka humbur jetën nga përmbytjet në Gjermani, konfirmoi për Radion Evropa e Lirë Zyra për Informim e Ministrisë së Punëve të Jashtme dhe Diasporës (MPJD) në Kosovë.

“Bazuar në të dhënat zyrtare, deri më tani ka humbur jetën një person me shtetësi kosovare, si dhe një person tjetër që ka njërin prind me shtetësi të Kosovës, përderisa viktima mban shtetësinë gjermane”, thuhet në deklaratën e MPJD-së, përcjell Albinfo.ch.

Gjermania, javën e kaluar, është përfshirë nga përmbytje masive.

Dy landet më të prekura nga përmbytjet janë: Rajnland Falc dhe Nordrajn Vesthalen.

Kancelarja gjermane, Angela Merkel, vizitoi të martën zonat e përmbytura në landin Nordrajn Vesthalen, ku premtoi ndihmë emergjente për njerëzit e prekur.

“Do të bëhen të gjitha përpjekjet që paratë të arrijnë shpejt te njerëzit. Shpresoj që kjo të realizohet brenda ditësh”, tha Merkel.

Kancelarja ka vizituar ditë më parë edhe zonat e prekura në Rajnland Falc.

 

---