Nis fushata online që shqiptarët e Maqedonisë të mos quhen “20%-shi”

Shqiptarët e Maqedonisë kanë nisur një fushatë online, ku bëjnë thirrje që me kushtetutë të njihen si ‘komuniteti shqiptar’, e jo vetëm si “bashkësia etnike mbi 20%”.

Në qendër të fushatës “Mos më quaj 20%, unë jam shqiptar”, janë kërkesat për partitë politike që ta japin kontributin e tyre dhe që përmes amendamenteve të propozojnë në parlament ndryshimin në kushtetutë të emërtimit “bashkësia etnike mbi 20%”.

Shqiptarët në këtë shtet e konsiderojnë fyes emërtimin e tyre vetëm me përqindje.

Fushata në Facebook, gjithashtu, synon edhe zëvendësimin në pjesët ku thuhet “gjuha e bashkësisë etnike mbi 20%”. Në vend të saj kërkojnë që të shkruhet “gjuha shqipe”.