Stokholm: Shfaqet filmi dokumentar “Ullmar Qvick, ambasador i kulturës shqiptare në Suedi”

Nën patronatin e Ambasadës së Kosovës në Stokholm, në bashkëpunim me rrjetin shqiptaro-suedez, u shfaq filmi dokumentar “Ullmar Qvick – Ambasador i Kulturës Shqiptare në Suedi – portret kulturor”, në regjinë e znj. Fitore Rubovci, shkruan albinfo.ch.

Ambasadorja Shkëndije Geci-Sherifi, në fjalën e saj të rastit, ndër të tjera tha se kontributi i albanologut Ullmar Qvick jo vetëm në promovimin e gjuhës dhe letërsisë shqipe, por edhe në afirmimin e çështjes shqiptare në qarqet intelektuale suedeze çmohet lart dhe ai me të drejtë gëzon epitetin Ambasador i Kulturës Shqiptare. Vetë prania e z. Ullmar Qvick e bëri madhështore këtë ngjarje kulturore, ndërkohë që fjala e tij drejtuar publikut zgjoi një emocion të jashtëzakonshëm. Të pranishëm në këtë eveniment ishin edhe ambasadori i Shqipërisë, z. Virgjil Kule, si dhe përfaqësues të shumtë dhe figura eminente të diasporës shqiptare, si Shqiptar Oseku, Shuquri Sejdiu etj., të cilët gjithashtu shprehën mirënjohje për veprimtarinë dhe kontributin e albanologut Ullmar Qvick.