Në kantonin Vaud të Zvicrës, personat që duan të përfitojnë subvencione për sigurimin shëndetësor do të duhet të punojnë me një përqindje më të lartë se deri tani.
Sipas rregullave të reja, një person beqar do të duhet të punojë të paktën 80 për qind, ndërsa deri më tani pragu ishte 70 për qind.
Për çiftet pa fëmijë, pragu do të rritet nga 140 në 160 për qind. Ndërkohë, çiftet me fëmijë nuk preken nga ndryshimi, pasi për ta norma mbetet në 100 për qind.
Propozimi ishte diskutuar më herët gjatë përgatitjes së buxhetit për vitin 2027, bëri të ditur Këshilli i Shtetit të Vaud. Nisma erdhi nga Departamenti i Shëndetësisë, ndërsa qeveria priste, ndër të tjera, publikimin e shumave të primeve të sigurimit për vitin 2027 përpara se të merrte vendimin përfundimtar.
Sipas autoriteteve, masa pritet të sjellë kursime prej rreth 30 milionë frangash zvicerane.
Një rregull specifik i kantonit Vaud
Kjo kërkesë për përqindjen e punës përbën një veçori të kantonit Vaud. Kantonet e tjera mund të kenë rregulla të ndryshme, ndërsa në Vaud subvencionet nuk u jepen personave që punojnë me kohë të pjesshme pa një arsye që shteti e konsideron të vlefshme.
Ndër arsyet e pranuara përfshihen, për shembull, kujdesi për fëmijët në ngarkim ose një përqindje pune e përcaktuar nga punëdhënësi.
Sipas direktivës kantonale, personat që punojnë me kohë të pjesshme pa një arsye të tillë konsiderohen se “kanë hequr qëllimisht dhe vullnetarisht dorë nga shfrytëzimi i plotë i kapacitetit të tyre për të fituar të ardhura”. Për këtë arsye, shteti nuk e konsideron gjendjen e tyre ekonomike si “modeste” dhe ata nuk përfitojnë nga subvencionet.
Sipas të dhënave të kantonit, rreth 250 persona u privuan nga subvencionet për këtë arsye gjatë vitit të kaluar.
Ndryshimi vjen në një kohë kur subvencionet për sigurimin shëndetësor përbëjnë një zë të rëndësishëm në financat e kantonit Vaud.
