Në Kantonin Vaud po mbahen zgjedhjet për parlament dhe qeveri

Nga zgjedhjet e vitit 2011 PS dhe të Gjelbrit kanë një shumicë prej 4 vetave në qeverinë me 7 ministra. FDP ka 3

Në Kantonin Vaud, në Zvicrën Perëndimore sot po mbahen zgjedhjet për përbërjen e parlamentit dhe qeverisë së re për pesë vitet e ardhshme. Nga 7 pjesëtarët e tashëm të ekzekutivit, për zgjedhje të serishme kandidojnë gjashtë. Sipas një sondazhi të realizuar nga radiotelevizioni në gjuhën frënge RTS, të gjithë kandidatët e deritashëm kanë shanse të mira për t`u rizgjedhur, pjesërisht edhe në raundin e parë.

Nga zgjedhjet e dhjetorit të vitit 2011 PS dhe të Gjelbrit kanë një shumicë prej 4 vetave në qeverinë me 7 ministra. Socialistët kanë 3, të gjelbrit një ndërsa FDP/PLR, e cila është partia tradicionalisht më e madhe në kanton dhe në parlament, i ka 3 vendet tjera në qeveri.

Zgjedhjet për parlamentin prej 150 vendesh konsiderohen edhe si test për SVP/UDC, e cila kohëve të fundit ka shënuar humbje të konsiderueshme në Zvicrën perëndimore (frankofone).

Në zgjedhjet për përbërjen e re të parlamentit kantonal janë së paku edhe dy kandidatë shqiptarë: Ervin Sheu dhe Sadik Krasniqi. Të dytë garojnë për PS.