Ndryshon emërtimi i zyrës për të huaj

Enti për Çështje policore dhe për të drejtën civile, nga 1 nëntori 2012 do të quhet Enti për Migracion dhe për të drejtën civile

Zyra që merret me çështje të të huajve në kantonin Grabünden dhe që deri më tash ka mbajtur emrin “Enti Kantonal për Çështje policore dhe për të drejtën civile”, nga 1 nëntori 2012 do të quhet “Enti për Migracion dhe për të drejtën civile” (AFM).

Siç thuhet në një komunikatë të këtij enti, emërtimi i deritashëm shkaktonte në vazhdimësi konfuzion , duke u ngatërruar me emërtimet e autoriteteve të policisë së komunave dhe në veçanti me Policinë Kantonale.  Veç kësaj, është konstatuar se emërtimi i vjetër nuk lidhet shumë me detyrat kryesore që ka enti në fjalë dhe nuk asocionon si emërtim me entet e ngjashme në kantonet tjera.

Që të gjithë sektorët e entit si ai për azil dhe zbatim, Policia për të Huaj, qendrat për identifikim si dhe Zyra kompetente për integrim, mbulojnë aspekte të ndryshme specifike të migracionit. Ndërsa sektori i të drejtës së shtetësisë dhe i të drejtës civile merret me natyralizimin dhe me çështje të migracionit.

Një përjashtim me rëndësi për këtë ent përbëjnë çështjet që lidhen me problemet e të drejtës civile. Këtu hyjnë çështje si e drejta ndërkombëtare private, e drejta personale, e drejta e emrit dhe ndryshimit të emrit.

Për këtë arsye, pjesa “civile” e emërtimit Enti për Migracion dhe për të drejtën civile, vazhdon të jetë e një rëndësie të veçantë, thuhet në komunikatën për shtyp të (ish) Entit Kantonal për  Çështje policore dhe për të drejtën civile.