Mungesa e Thaçit në varrimin e babait, reagime të shumta

Gjykata Speciale refuzoi lejen, Thaçi nuk do të jetë pjesë në varrimin e babait të tij

Ish-presidenti i Kosovës, Hashim Thaçi, që ndodhet në paraburgim në Hagë, nuk do të mund të marrë pjesë në ceremoninë e varrimit të atit të tij, përcjell albinfo.ch.

Kjo iu pamundësua nga Gjykata Speciale, e cila nuk i dha leje të përkohshme për t’i dhënë lamtumirën e fundit babait të tij.

Haxhi Thaçi, pas një sëmundjeje, vdiq më 17 mars dhe do të varroset në Burojë këtë të martë në orën 15:00.

Organizatat e Veteranëve të Luftës së UҪK-së këtë vendim e kanë cilësuar si shkelje të të drejtave të njeriut dhe kanë kërkuar reagim nga institucionet ndërkombëtare, organizatat e të drejtave të njeriut dhe faktori politik në Kosovë e Shqipëri.

Kryetari i Partisë Demokratike të Kosovës, Memli Krasniqi, e ka quajtur të padrejtë dhe të papranueshëm refuzimin e kërkesës nga Dhomat e Specializuara.

“Ajo që po ndodh sot nuk ka lidhje me drejtësi, por me diskriminim. Nuk është ligj, por arbitraritet”, ka thënë Krasniqi.

Ndërkohë, Ministrja e Drejtësisë në Kosovë, Albulena Haxhiu, ka nisur një letër në drejtim të Gjykatës Speciale, ku kërkon të rishqyrtohet vendimi në mënyrë që të mos shkelen të drejtat e Hashim Thaçit.

Kundër refuzimit të kërkesës së ish-presidentit Hashim Thaçi nga Dhomat e Specializuara ka dalë edhe kryeministri i Shqipërisë, Edi Rama.

“Një turp i ri nga një tribunal i turpshëm dhe i paturpshëm, i cili e ka kthyer drejtësinë ndërkombëtare në një farsë, të drejtat demokratike në fjalë boshe dhe vullnetin e mirë të Parlamentit të Kosovës në bumerangun më brutal!”, ka shkruar Rama.

Këtë shkrim të Ramës, në rrjetet sociale, e ka shpërndarë edhe Richard Grenell, i dërguari për misione të posaçme i presidentit amerikan.

Hashim Thaçi, më 13 mars, me leje të përkohshme, vizitoi të atin e sëmurë në spital. Ai ndodhet në paraburgim që nga nëntori i vitit 2020, nën akuzën për krime lufte dhe së fundmi edhe për pengim të drejtësisë.

---