Mjekët e Kosovës protestojnë: Prej 8 vjetësh pagat nuk na janë rritur

Mantilbardhët këtë herë nuk po bëheshin gati për punë, por për protestë, transmeton albinfo.ch.

Përfaqësues të të gjitha kategorive të sistemit shëndetësor janë mbledhur para qeverisë për të kërkuar pjesëmarrje në grupin punues për hartimin e Projektligjit për pagat, që do t’ua mundësonte rritjen e pagave dhe vlerësimin e barabartë të tyre.

Ata po ankohen se për tetë vjet pagat e tyre nuk janë rritur, e dallimi me sektorin privat është i lartë.

Si rrjedhojë, Kryetari i Federatës së Sindikatave të Shëndetësisë, Blerim Syla, ka paralajmëruar grevë nga java e ardhshme, nëse nuk përfshihen në grupin punues.

Sipas kësaj federate, vetëm në tetë muajt e parë të këtij viti 122 mjekë të moshës mesatare 31-vjeçare kanë ikur nga vendi, ashtu si edhe qindra infermierë.