Mirlind Daku huazohet te kampioni i Sllovenisë

Mirlind Daku është larguar nga Kroacia dhe karrierën do ta vazhdojë në Slloveni.

Sulmuesi gjilanas pas gjashtë muajve të kaluar tek Osijeku, tani është huazuar në elitën e futbollit slloven.

Është kampioni në fuqi i Sllovenisë, NS Mura që ka fituar garën me ekipet e tjera të interesuara për t’i marrë shërbimet e Dakut.

24-vjeçari është huazuar te Mura për gjashtë muaj nga skuadra kroate Osijek.

Ka qenë klubi slloven që tanimë e ka prezantuar Dakun dhe janë shumë të lumtur që kanë marrë reprezentuesin kosovar në radhët e veta.

“Mirlind Daku është një futbollist që e kemi ndjekur prej kohësh. Shifrat e tij, sidomos nga kampionati i Kosovës flasin vetë. Ai është një sulmues që është mësuar të shënojë gola. Besoj se do të intensifikojë konkurrencën në sulm dhe do të na ndihmojë të arrijmë rezultatet më të mira të mundshme”, deklaroi drejtori sportiv i Muras, Denis Rajbar.