Minus 36 gradë – mbrëmë ishte nata më e ftohtë e vitit

Rekordii i uljes së zhivës në termometër, me minus 36 gradë celsius, kësaj here është shënuar në Muotathal të kantonit Schwyz

Nata në mes të të shtunës dhe të dielës, 9-10 shkurt ka qenë më e ftohta deri më tash për këtë vit. Rekordii i uljes së zhivës në termometër, me minus 36 gradë celsius, kësaj here është shënuar në Muotathal të kantonit Schwyz. Mirëpo temperatura të përafërta me të janë regjistruar edhe në regjone tjera malore në Zvicër. Kështu në La Brévine të kantonit të Neuschatelit temperatura ka qenë – 31 gradë. Ndërsa -29.4 gradë janë regjistruar sipas SRF Meteo në Glattalp, mandej -27.2 gradë në Samedan etj.

Acar i madh ka mbretëruar edhe në Davos, -20.4 gradë dhe në Einsiedeln -17.7 gradë etj.

Po ashtu edhe në regjonet e rrafshta dhe në qytete mbrëmë kanë mbretëruar temperatura të akullta. Në Bernë për shembull shigjeta në termometër ka treguar minus 12.4 gradë celsius, në Aarau -8, në Bazel -7.3 dhe ne Cyrih -6.4 gradë.

Acari i  madh që ka mbretëruar të shtunën dhe po vazhdon akoma, ka shkaktuar disa pengesa në komunikacionin hekurudhor. Disa linja lokale dhe regjionale sidomos në regjionin e gjerë të kantonit të Bernës është dashur të anuloheshin në mëngjesin e sotëm.