Flet mikrobiologia kosovare që u vaksinua në Kukës

Kolegët e mi pas marrjes së vaksinës patën simptoma

Më 20 mars, mikrobiologia nga Kosova, Donjeta Pllana-Hajdari, ka marrë vaksinën kundër Covid-19 në Kukës.

Ajo tregoi që pas marrjes së vaksinës nuk ka pasur alergji, por vetëm dhimbje në pjesën e krahut ku është marrë vaksina.

Por, ajo tha se kolegët e saj kanë pasur simptoma, si temperaturë, ethe e plogështi.

“Vetë personalisht s’kom pas alergji, vetëm dhimbje në pjesën e krahut ku është marrë vaksina. Ka pas kolegë tjerë që kanë pasë simptoma, temperaturë, ethe, plogështi, simpotma të lehta, por që kanë kaluar.

Pas marrjes së vaksinës, reaksioni mund të paraqitet menjëherë, simptomat e tjera janë të lehta dhe largohen për rreth 24 orë”.

Mikrobiologia tregoi të gjithë procesin deri te vaksinimi, teksa shtoi që edhe dozën e dytë do ta marrin në Kukës.

“Unë e kom marrë vaksinën më 20 mars, në grupin e parë të punëtorëve shëndetësorë. Organizim fantastik, meqenëse i gjithë procesi ka përfundu për rreth 1 orë. Atje na kanë prit punëtorët shëndetësorë. Na kanë marrë historikun shëndetësor, pastaj është bërë rënditja dhe menjëherë jemi vaksinuar, kemi qëndruar 25-30 minuta për ndonjë proces të mundshëm alergjik që ka mund me u paraqit. Vaksinimi ështe metoda më efikase që na mbron. S’kom hezitu me marrë, jam gëzu shumë, i ftoj të gjithë që ta marrin vaksinën”.

“Dozën e parë në Kukës, dozën e dytë pas 4-12 javësh, neve na është thënë që dozën e dytë duhet ta marrim në Kukës”, u shpreh ajo, raportojnë mediat kosovare, përcjell Albinfo.ch.

---