Mijëra njerëz dalin në rrugët e Bernës në mbështetje të komunitetit queer

Mijëra njerëz marshuan sot në Bernë për të kërkuar më shumë barazi, mbrojtje ligjore dhe siguri për komunitetin queer.

Mijëra persona morën pjesë të shtunën në Festivalin Pride në Bernë, duke marshuar në mbështetje të të drejtave të komunitetit queer dhe duke kërkuar më shumë barazi, mbrojtje ligjore dhe siguri për personat LGBTIQ+, përcjell albinfo.ch.

Demonstrata nisi në sheshin Waisenhausplatz, prej nga pjesëmarrësit marshuan në mënyrë paqësore nëpër rrugët e qytetit të vjetër të Bernës, të zbukuruara me flamuj shumëngjyrësh. Marshimi përfundoi në Bundesplatz, ku u zhvillua festivali me fjalime, muzikë dhe aktivitete kulturore.

Një nga zërat kryesorë të tubimit ishte politikania socialdemokrate dhe aktivistja Anna Rosenwasser, e cila tha se, pavarësisht përparimeve të viteve të fundit, Zvicra ende nuk garanton barazi të plotë për komunitetin queer. Sipas saj, familjet me prindër të të njëjtit seks vazhdojnë të përballen me boshllëqe ligjore, ndërsa në disa kantone ende mungojnë masa të mjaftueshme kundër diskriminimit dhe praktikave të ashtuquajtura të “terapisë së konvertimit”.

Edhe përfaqësues të tjerë politikë kërkuan përshpejtimin e reformave ligjore. Deputetja e Partisë së Gjelbër, Lea Blattner, bëri thirrje për miratimin sa më të shpejtë të ndalimit të terapisë së konvertimit, duke theksuar se mbrojtja e të drejtave themelore nuk duhet të vonohet nga procedurat politike.

Organizatorët theksuan se, megjithëse pranimi shoqëror ndaj komunitetit queer është rritur në Zvicër, shumë persona vazhdojnë të përballen me diskriminim dhe armiqësi në jetën e përditshme. Pikërisht për këtë arsye, marshimi i këtij viti u përqendrua te solidariteti, barazia dhe nevoja për mbrojtje më të madhe ligjore për të gjithë qytetarët.

---