Migros-i, 16 për qind më pak fitim gjatë vitit 2016

Shkak për këtë rënie, sipas një komunikate të lëshuar nga Migrosi është te humbjet që kanë shënuar kompanitë e tij vartëse dhe te blerjet e zviceranëve jashtë vendit

Migros, që është ndërmarrja më e madhe e tregtisë me pakicë në Zvicër, ka shënuar një rënie të theksuar të fitimit gjatë vitit 2016. Ndonëse qarkullimi në tërësi është rritur për 1.2 për qind duke arritur në 27.7 miliardë franga, fitimi neto ka shënuar një rënie prej 16.2 për qind. Kështu, gjiganti i tregtisë zvicerane vitin qüë shkoi ka fituar vetëm 663 milionë franga, shkruan srf.ch.

Shkak për këtë rënie, sipas një komunikate të lëshuar nga Migrosi është te humbjet që kanë shënuar kompanitë e tij vartëse. Po ashtu, viti 2016 ka qenë i karakterizuar nga turizmi për të blerë, gjegjësisht shkuarja e banorëve të Zvicrës për të bërë shoping në shtetet fqinje, me çmime më të ulëta. Kjo, dhe frangu i fortë kanë ndikuar në bilancin e përgjithshëm.

Ndikim në afarizmin e Migrosit ka pasur edhe tregtia online, ku kjo ndërmarrje tashmë ka marrë pozicionin e parë në Zvicër. Qarkullimi i përgjithshëm elektronik është rritur për 16 për qind.