Mërgimtarët përfundojnë pushimet, pritje deri në një orë në dalje të Kosovës

Ndërkohë, në hyrje të Kosovës, pritjet janë përgjithësisht më të shkurtra.

Mërgimtarët që po përfundojnë pushimet në Kosovë kanë nisur të përballen me pritje në disa prej pikëkalimeve kufitare, kryesisht në dalje të vendit, transmeton albinfo.ch.

Sipas të dhënave të fundit të Qendrës Kombëtare për Menaxhim Kufitar, pritjet më të gjata janë regjistruar në pikën kufitare Dheu i Bardhë, ku në dalje nga Kosova qytetarët po presin deri në 60 minuta.

Pritje janë raportuar edhe në pika të tjera kufitare. Në Jarinjë pritjet në dalje arrijnë deri në 25 minuta, ndërsa në Merdarë deri në 15 minuta.

Në pikëkalimet e tjera kufitare nuk janë raportuar pritje të gjata në dalje të Kosovës.

Ndërkohë, në hyrje të Kosovës, pritjet janë përgjithësisht më të shkurtra. Koha më e gjatë e pritjes është raportuar në Merdarë, ku qytetarët po presin deri në 15 minuta, ndërsa në pikat e tjera kufitare nuk ka pritje të konsiderueshme.

Rritja e fluksit në dalje të Kosovës lidhet me kthimin e mërgimtarëve pas përfundimit të pushimeve verore, ndërsa autoritetet kufitare vazhdojnë të monitorojnë situatën në të gjitha pikëkalimet. /Albinfo.ch

---