Më 22 janar vendoset se a do të lejohet të kandidojë në zgjedhje Albin Kurti

Para disa dite, qeveria e Avdulla Hotit u rrëzua nga vota e pavlefshme e një deputeti, Etem Arifi, i cili ishte dënuar më parë me 1.3 vjet burgim për mashtrim me subvencionet.

Referuar Gjykatës Kushtetuese, çdo person që në 3 vjetët e fundit është dënuar për vepër penale me vendim të formës së prerë me një ose më shumë vjet burgim, atëherë nuk lejohet të kandidojë. Kjo sipas të gjitha gjasave do të penalizojë Albin Kurtin, pasi ish-kryeministri së bashku me deputetë të tjerë, Donika Kadaj-Bujupin, Faton Topallin dhe Albulena Haxhiun u dënuan më 2018 për hedhjen e gazit lotsjellës në Kuvend.

Kurti u dënua me 1.6 vjet më 2018 dhe me këtë gjykim nuk i lejohet kandidimi deri në shtator 2021, duke e përjashtuar nga zgjedhjet e 14 shkurtit. E ndërsa nga Vetëvendosja janë të qartë dhe të prerë për faktin që Kurti do të jetë në krye të listës për zgjedhjet e ardhshme, më 14 shkurt të këtij viti, kryetarja e Komisionit Qendror të Zgjedhjeve në Kosovë, Valdete Daka, në një intervistë për emisionin “Ballkan” të Linda Karadakut në “ABC” deklaroi se vendimi mbi fatin e ish-kryeministrit do të merret më 22 janar.

“Diku rreth datës 22 do të dalim me vendim dhe natyrisht është e mundur të apelohet në instanca të tjera. Vendimi do të merret në mënyrë kolegjiale”, tha Daka, ndërsa intervistën e plotë do ta ndiqni ditën e mërkurë në 20:00 në emisionin “Ballkan” në “ABC”. Por nëse Kurtit nuk i lejohet të kandidojë për deputet, a e pengon vendimi që të jetë kryeministër nëse arrin që të fitojë zgjedhjet dhe të formojë qeverinë e re?

Interpretimet janë të shumta.