Mbrëmje e veçantë artistike në Zagreb për diasporën shqiptare

Ansambli frymor “Fryma Artistike” nga Peja solli në Zagreb një koncert që bashkoi diasporën shqiptare përmes muzikës klasike dhe traditës shqiptare.

Një mbrëmje e veçantë artistike për diasporën shqiptare u organizua në Zagreb të Kroacia, me pjesëmarrjen e shumë bashkatdhetarëve dhe dashamirëve të kulturës shqiptare, transmeton albinfo.ch.

Koncerti u mbajt në sallën Novinarski Dom, ku ansambli frymor “Fryma Artistike” nga Peja prezantoi një program të pasur muzikor, duke ndërthurur veprat e muzikës klasike me tingujt e traditës shqiptare.

Nën dirigjimin e profesor Fatbardh Gashi dhe me udhëheqjen artistike të Arsim Kelmendit, ansambli dëshmoi nivel të lartë profesionalizmi dhe interpretimi artistik. Programi përfshinte nga valset klasike deri te meloditë tradicionale shqiptare, duke krijuar një atmosferë emocionale dhe duke sjellë një përjetim të veçantë për publikun.

Ngjarja u organizua nga Bashkësia e Shqiptarëve të qytetit dhe prefekturës së Zagreb dhe u vlerësua si një aktivitet i rëndësishëm kulturor që forcon lidhjet e diasporës shqiptare me kulturën dhe traditat e vendit të origjinës.

Artistët u përgëzuan për interpretimin dinjitoz dhe për kontributin në promovimin e kulturës dhe artit shqiptar në diasporë./Albinfo.ch

---