Mbrëmë në Zvicër, zhiva zbriti në -29.9 gradë!

Në fshatin La Brevine, të njohur si “Siberia e Zvicrës”, zhiva në termometër mbrëmë ka rënë në minus 29.9 gradë celsius

Rrymat e ftohta ajrore nga Arktiku kanë shkaktuar temperatura të akullta në Zvicër. Kjo ka bërë që të edhe një herë, fshati La Brevine, i njohur si “Siberia e Zvicrës”, të shënojë edhe një rekord për periudhën e deritashme të vitit: zhiva në termometër në këtë fshat mbrëmë ka rënë në minus 29.9 gradë celsius, shkruan srf.ch.

Por La Brevine nuk ishte “Siberia” e vetme e natës së mbrëmshme, shkruan albinfo.ch. Kështu në Corvatsch të Kantonit Graubünden, në lartësinë  mbidetare 3315 metra, temperatura gjatë natës ka rënë në minus 26.9 gradë. Ndërsa në majën e lartë 3580 metra, Jungfraujoch në Kantonin e Bernës është shënuar temperatura prej minus 24 gradësh celsius.

Por, temperatura të acarta janë regjistruar edhe në ultësira dhe në Zvicrën qendrore. Në Welschenrohr (Kantioni i Soloturnit) ka qenë minus 18.3 gradë ndërsa në Aeroportin e Cyrihut, zhiva në termometër ka rënë në minus 13.6 gradë.

Stacioni meteorologjik SRF Meteo pret që në natën e sontme në Oberengadin të shëmnohen temperatura prej minus 30 gradësh.