Maurer: Zvicra mund të strehojë përkohësisht 50 mijë refugjatë

"Do të kishim një situatë kaotike dhe që nuk do të ishte e qëndrueshme për shumë muaj, por një kulm mbi kokë dhe një shujtë të ngrohtë Zvicra mund t`ua ofrojë dhjetëra mijë njerëzve"

Keystone

Ndryshe nga  Gjermania, Austria ose Hungaria, Zvicra aktualisht nuk është cak i flukseve të mëdha të refugjatëve. Por, në rast nevoje emergjente, Zvicra, për kohë të shkurtë  mund të strehojë rreth 50 mijë refugjatë. Sigurisht, bëhet fjalë për strehim afatshkurtër dhe emergjent, në strehimoret e mbrojtjes civile (bunkerë) ka deklaruar sot në Vorb ministri zviceran i mbrojtjes, Ueli Maurer.

Do të kishim një situatë kaotike dhe që nuk do të ishte e qëndrueshme për shumë muaj, por një kulm mbi kokë dhe një shujtë të ngrohtë Zvicra mund t`ua ofrojë dhjetëra mijë njerëzve. Më tutje ministri ka theksuar se ai shpreson që në Zvicër nuk do të ketë një skenar sikur në Hungari ose në Austri , por nuk përjashtohet mundësia që Zvicra të bëhet brenda pak orësh ose ditësh, cak i refugjatëve.

Nga 150 mijë vendet në qendrat për strehim të mbrojtjes civile nëpër kantone, për një kohë të shkurtë do t`i vinim në dispozicion 50 mijë sish.

Maurer në bashkëbisedimin e bërë në kazermën ushtarake në Bernë ka shprehur edhe shqetësimin se në mesin e refugjatëve mund të infiltrohen edhe terroristë të IS-it.