Majko dhe Gashi nderojnë dëshmorët e Atlantikut, vëllezërit Bytyqi

Babai i tre vëllezërve, Ahmet Bytyqi, i falënderoi dy ministrat për vizitën dhe u shpreh se është i nderuar që dy shtete erdhën dhe nderuan veprën e bijve të tyre

Dy ministrat shqiptar të Diasporës, që po qëndrojnë në Shtetet e Bashkuara të Amerikës, Pandeli Majko i Shqipërisë dhe Dardan Gashi i Kosovës, kanë bërë homazhe te varrezat në Yonkers, Nju-Jork, ku pushojnë eshtrat e vëllezërve Mehmet, Agron dhe Yll Bytyqi, dëshmorë të kombit të cilët brutalisht u vranë nga pjesëtarë të MUP-it serb, në qershor të vitit 1999.

Ministri i Diasporës dhe Investimeve Strategjike, Dardan Gashi, i shoqëruar edhe nga ministri i Diasporës i Shqipërisë, Pandeli Majko, takuan pjesëtarët e batalionit “Atlantiku”, në hotelin prej nga ky batalion edhe u nis për të luftuar krah për krah bashkëkombësve në radhët e UÇK-së, me të cilët biseduan për zhvillimet në Kosovë dhe Shqipëri, si dhe për tema që e preokupojnë diasporën në ShBA.

Më pas, së bashku me prindërit e djemve Bytyqi u nisën për te varrezat, për të nderuar veprën dhe sakrificën e tyre me homazhe shtetërore dhe me vendosje të kurorës me lule.

Babai i tre vëllezërve, Ahmet Bytyqi, i falënderoi dy ministrat për vizitën dhe u shpreh se është i nderuar që dy shtete erdhën dhe nderuan veprën e bijve të tyre.

“Ata kanë rënë dëshmorë, mirëpo në momente të tilla kur ju vini që t’i kujtoni, atëherë ata mbesin gjithmonë të gjallë. Ju faleminderit!”, tha ai, duke falënderuar Ministrinë e Diasporës së Kosovës edhe për dekoratën e ndarë për familjen Bytyqi, citon KP.

“Vepra e tre vëllezërve Bytyqi nuk do të harrohet asnjëherë. Neve na mbetet të punojmë dhe të bëjmë trysni ndaj Serbisë që t’i dorëzojë kriminelët përgjegjës të këtij krimi sa më shpejt, ndërsa veprën dhe sakrificën e tyre ta kujtojmë gjithmonë”, u shpreh ministri Gashi, transmeton albinfo.ch.