Macron premton këshillim falas psikologjik për fëmijët dhe adoleshentët

Shëndeti mendor i të rinjve është bërë një shqetësim kryesor gjatë krizës shëndetësore dhe një ishte nga arsyet pse Franca vonoi vendosjen e kufizimeve kombëtare gjatë muajit mars.

Në kushte të tilla, presidenti francez Emmanuel Macron gjatë vizitës në pediatrinë në Reims premtoi këshillim falas psikologjik për fëmijët dhe adoleshentët.

Fëmijët e moshës nga tre vjeç deri në 17-vjeç do të kenë të drejtë për 10 seanca falas me një psikolog, raporton Euronews, përcjell Albinfo.ch.

“Ne kemi vendosur të rimbursojmë 100 përqind kujdesin psikiatrik për fëmijët, bazuar në një recetë të mjekut të familjes ose shkollës, psikiatrit ose personelit të spitalit, 10 seanca do të rimbursohen plotësisht. Kështu që familjet do të kenë akses në ndihmën e parë nga psikologët dhe do të të ndihmohen financiarisht. Është e rëndësishme që të gjithë të kuptojnë efektet që kanë pasur mbi fëmijët dhe adoleshentët mbyllja e shkollës, qendrave sportive, sepse traumatizojnë më të vegjlit dhe jeni ju ata që duhet t’i ndihmoni më pas”, u shpreh Emmanuel Macron, presiden i Francës.

Sipas sondazheve të kryera nga Shëndeti Publik në France, përqindja e francezëve që raportojnë ankth ose depresion është rritur ndjeshëm që nga mbyllja e parë, duke prekur gati një të tretën e popullsisë.

Psikiatrët thonë se vdekjet e të dashurve nga COVID-19, përçarjet e jetës, mjegullimi i të ardhmes kanë pasur efekte shkatërruese në shëndetin mendor të një numri alarmant të fëmijëve dhe adoleshentëve.

Mjekët kanë raportuar gjithashtu rritje të urgjencave psikiatrike që përfshijnë vetëvrasje në tentativë, vetëlëndim, sulme paniku dhe simptoma të tjera të ankthit mendor.

Përtej paketës së urgjencës, Emmanuel Macron premtoi se më shumë përgjigje strukturore do të diskutohen në konferencën për shëndetin mendor të planifikuar për këtë verë.

Në fillim të prillit, qeveria nisi një fushatë publike për të inkurajuar francezët të “flasin” për gjendjen e tyre psikologjike dhe për t’i kujtuar ata për ekzistencën e mbështetjes edhe online.