Ligji për arsimin e lartë në Maqedoni: BDI e refuzon, VLEN në pritje

BDI ka njoftuar se nuk do ta mbështesë projektligjin e ri për arsimin e lartë, duke vlerësuar se ai cenon autonominë universitare në Maqedoninë e Veriut. Sipas tyre, ligji i jep Ministrit të Arsimit dhe Qeverisë kompetenca të gjera për të ndërhyrë në vendimmarrjen akademike, në menaxhimin financiar dhe në funksionimin e institucioneve të arsimit të lartë.

Nga kjo parti theksohet se propozimi i ri e dobëson demokracinë e brendshme universitare dhe e përqendron vendimmarrjen në pak duar. Ata konsiderojnë se liria akademike duhet të mbrohet dhe universitetet duhet të ruajnë pavarësinë e tyre në punë dhe organizim. Për këtë arsye, BDI e ka quajtur projektligjin të papranueshëm dhe ka bërë të ditur se nuk do ta votojë.

Në anën tjetër, koalicioni VLEN ende nuk ka marrë një qëndrim përfundimtar. Ata po presin versionin e fundit të projektligjit për të parë nëse janë marrë parasysh vërejtjet dhe propozimet e tyre.

VLEN thekson se gjatë procesit të konsultimeve ka dhënë sugjerime dhe se tani është në pritje të draftit final. Sipas tyre, çdo reformë në arsim të lartë duhet të bëhet në mënyrë gjithëpërfshirëse dhe me konsensus të gjerë, duke përfshirë edhe komunitetin akademik, për të siguruar cilësi dhe stabilitet afatgjatë.