LAPSH në Bavari përmbyll me sukses vitin shkollor 2025/2026

Lidhja e Arsimtarëve dhe Prindërve Shqiptarë falënderon mësuesit, nxënësit dhe prindërit për kontributin në ruajtjen e gjuhës dhe identitetit shqiptar.

Lidhja e Arsimtarëve dhe Prindërve Shqiptarë në Bavari (LAPSH) ka përmbyllur me sukses vitin shkollor 2025/2026, duke vlerësuar angazhimin e mësuesve, nxënësve dhe prindërve në misionin për ruajtjen dhe zhvillimin e gjuhës, kulturës dhe identitetit shqiptar në diasporë, transmeton albinfo.ch.

Përmes një njoftimi, LAPSH thekson se edhe gjatë këtij viti shkollor, me përkushtim, bashkëpunim dhe dashuri për gjuhën amtare, është vazhduar puna për edukimin e brezave të rinj dhe forcimin e lidhjes së tyre me trashëgiminë kombëtare.

“Lidhja e Arsimtarëve dhe Prindërve Shqiptarë në Bavari përfundoi me sukses vitin shkollor 2025/2026. Me përkushtim, bashkëpunim dhe dashuri për gjuhën amtare, edhe këtë vit vazhduam misionin tonë për ruajtjen dhe kultivimin e gjuhës, kulturës dhe identitetit shqiptar te brezat e rinj”, thuhet në njoftim.

LAPSH shprehu mirënjohje për të gjithë mësuesit, nxënësit, prindërit dhe bashkëpunëtorët për kontributin e tyre, duke u uruar njëkohësisht pushime të mbara verore.

Në përfundim, organizata uroi që të gjithë të ritakohen me energji të reja në fillim të vitit të ri shkollor 2026/2027./Albinfo.ch

---