Kurti: Thaçi e Haradinaj bënë pazar për drejtorin e AKI-së e Policisë

Kryetari i Lëvizjes Vetëvendosje, Albin Kurti, e ka akuzuar kryeministrin Haradinaj se ka bërë pazar me presidentin Hashim Thaçi për emërtimin e drejtorit të AKI-së e atij të Policisë së Kosovës. Kurti ka thënë se Kosovës i nevojitet vettingu, jo vetëm i Gjyqësorit e Prokurorisë, por edhe i Policisë e Inteligjencës.

“Kur kryeministri thotë t’ia lëmë këtë çështjen ‘Maxhuni’ organeve të rendit a sistemit të drejtësisë, ai po thotë “na e leni këtë punë neve”, thua se bëhet fjalë për çështje private dhe jo publike. Kapësit e shtetit e kanë ndarë popullsinë në familjarët e tyre të paprekshëm dhe qytetarët e tjerë të pambrojtur. Paanshmëria, objektiviteti dhe profesionalizmi i organeve shtetërore, matet pikërisht në raste të këtilla siç ishte ai ‘Maxhuni’ i 12 tetorit (i publikuar vetëm një javë më pas), e jo në rastet e hajnave të pulave” , ka shkruar Kurti.