Kurti kërkon nga BE-ja statusin e vendit kandidat dhe hapjen e negociatave për Kosovën

Kurti: Ka ardhur koha që BE-ja ta avancojë Kosovën

Kryeministri në detyrë i Kosovës, Albin Kurti, ka pritur në takim drejtoren për Zgjerim dhe Fqinjësi të Bashkimit Evropian për Ballkanin Perëndimor, Valentina Superti, gjatë vizitës së saj të parë zyrtare në Kosovë, përcjell albinfo.ch.

Përmes një postimi në Facebook, Kurti tha se Kosova ka shënuar përparim në sundimin e ligjit, luftën kundër korrupsionit, të drejtat politike, demokracinë dhe reformat evropiane, si dhe ka regjistruar rritje të vazhdueshme ekonomike.

Ai theksoi se anëtarësimi në Bashkimin Evropian mbetet synimi strategjik i Kosovës, duke kërkuar që BE-ja t’i përgjigjet vullnetit të qytetarëve me avancimin e statusit të vendit kandidat dhe hapjen e negociatave për anëtarësim.

Në takim u diskutua edhe për Planin e Rritjes, integrimin e Kosovës në zonën “Roam Like at Home”, Procesin e Berlinit, bashkëpunimin rajonal, si dhe çështje që lidhen me infrastrukturën, tregtinë, digjitalizimin dhe arsimin./Albinfo.ch

---