Kurti jep detaje rreth takimit me kancelarin gjerman

Kryeministri i Kosovës, Albin Kurti, ka dhënë detaje rreth takimit me kancelarin e Gjermanisë, Olaf Scholz, në Berlin.

Përmes një postimi në rrjetin social “Facebook”, ai ka njoftuar se me kancelarin gjerman kanë biseduar për dinamikën e situatës në Ballkanin Perëndimor, procesin e dialogut dhe përkushtimin e Kosovës drejt integrimit evropian.

“Kosova është shtet i së drejtës, demokracisë e barazisë për të gjithë. Biseduam dhe rreth dinamikës e situatës në rajonin e Ballkanit Perëndimor, procesin e dialogut e përkushtimin e Kosovës drejt integrimit evropian. Nuk mund të mungonte dhe takimi me mërgatën, ku biseduam mbi një mori temash, i interesuar jo vetëm për t’i informuar me ecurinë e aktualitetin e vendit tonë, por edhe për të dëgjuar rreth jetës e përvojës së tyre, përshtypjeve e ideve të diasporës”, ka shkruar ai, përcjell albinfo.ch.

Tutje Kurti ka shkruar se në margjina të Kongresit, takimi me Kancelarin Scholz dëshmoi marrëdhëniet e forta dhe të shkëlqyeshme dypalëshe dhe vizionin e përbashkët si socialdemokrat për zhvillimin dhe rritjen e mirëqenies në të dy vendet.