Kur do të hapen çerdhet në Maqedoninë Veriore

“Me të vërtetë është e vështirë për mua të them tani, por unë mendoj se çerdhet e fëmijëve mund të fillojnë që në shtator”, tha Venko Filipçe, ministër i Shëndetësisë

Nuk përjashtohet mundësia që çerdhet të fillojnë me punë në muajin shtator në Maqedoninë Veriore.

Këtë e paralajmëroi ministri i Shëndetësisë i Maqedonisë Veriore, Venko Filipçe duke shtuar se protokollet se si të organizohet puna e çerdheve tashmë janë diskutuar disa here, ndërsa janë marrë në konsideratë edhe modelet nga vendet e tjera.

Filipçe, tha se në mbledhjen e fundit të Komisionit për Sëmundje Infektive është diskutuar edhe fakti se si të veprohet në rast se ndonjë prej fëmijëve shfaq rritje të temperaturës së trupit.

“Kemi diskutuar dhe i kemi sqaruar të gjitha dilemat në lidhje me të gjitha aspektet për fillimin e punës së çerdheve, kështu që duhet që në seancë në Qeveri të merret vendim i përshtatshëm, me propozim të Ministrisë së Punës dhe Politikës Sociale, për datën e saktë të nisjes me punë të çerdheve. Me të vërtetë është e vështirë për mua të them tani, por unë mendoj se çerdhet e fëmijëve mund të fillojnë që në shtator”, tha Venko Filipçe, ministër i Shëndetësisë, raporton Alsat, përcjell albinfo.ch.

Ndërkohë, për fillimin e vitit të ri shkollor, Filipçe tha se modeli i kombinuar është zgjidhja më e mirë.

Sipas tij  ky koncept do të shmangte skenarin e padëshiruar të fëmijëve të sëmurë me Covid19.

“Ne jemi të vetëdijshëm se mësimi në internet është vetëm një mundësi tani, por, duke pasur parasysh që shëndeti i fëmijëve ka përparësi, ne e bëjmë gradualisht hyrjen e nxënësve në klasë. Në këtë rast, për shkak të hapësirës tani të lirë në shkolla, ku do të mësojnë vetëm fëmijët nga klasa e parë deri në të tretë, me pëlqimin e prindërve, më tej, sipas situatës epidemiologjike do të përfshihen edhe ato të klasës së gashtë dhe vitit të parë shkollë të mesme”, pohoi Filipçe.

Pavarësisht paralajmërimeve pozitive nga ministri i Shëndetësisë Filipçe, Unioni i Nxënësve të Shkollave të Mesme ka paralajmëruar protestë për të hënën.

Nxënësit kërkojnë që mësimi në shkolla të mesme të realizohet me prani fizike dhe formë të kombinuar.

---