Kosovë: Bllokohen 34 llogari bankare, rreth 600 mijë euro, sekuestrohen 4 automjete

Prokuroria Speciale e Kosovës njofton opinionin publik se janë duke vijuar veprimet hetimore lidhur me vjedhjen e 2.1 milionë eurove nga Thesari i Shtetit, ku deri më tani janë arrestuar dy persona.

Në një komunikatë për media thuhet se në procesin e hetimeve janë përfshirë edhe institucionet dhe njësitë si Njësia e Inteligjencës Financiare (NJIF), Policia e Kosovës-Departamenti për Hetimin e Korrupsionit,  Administrata Tatimore e Kosovës (ATK) etj.

Deri më tani janë intervistuar bartës të llogarive në të cilat janë transferuar të hollat, është bërë intervistimi i dëshmitarëve, analizimi i dokumentacionit, hetimi financiar dhe identifikimi i pronave. Gjithashtu, janë ngrirë 34 llogari bankare, të bizneseve në të cilat janë transferuar të hollat nga i pandehuri K.Sh., pronar i LDA Group.

Deri më tani shuma e përgjithshme e ngrirë është rreth 600.000 euro, katër automjete janë sekuestruar me vlerë rreth 100.000 euro.

Prokuroria Speciale ka bërë dy kërkesa adresuar autoriteteve të Turqisë, lidhur me transferin prej 440.000 euro, të realizuara nga llogaria e LDA Group në pronësi të të pandehurit K.Sh, në llogarinë e një biznesi me seli në Turqi. Është kërkuar ngrirja e llogarisë së identifikuar, është bërë identifikimi i bartësit/pronarit të llogarisë, personat e autorizuar, janë shikuar pasqyrat e transaksioneve.

Ndryshe, sipas ish-ministres së Financave, Hykmete Bajrami, transaksioni prej mbi 2 milionë eurove është transaksion bankar dhe ka gjurmë për gjithçka, ndërsa për transaksionin nuk është kërkuar nënshkrimi i saj dhe as nënshkrimi i drejtorit të Thesarit të Kosovës.

2.1 milionë euro nga Thesari i Shtetit kanë shkuar në llogari të një operatori ekonomik, e lidhur me këtë rast janë suspenduar dy punëtorë të Thesarit të Shtetit. Mjetet janë tërhequr nga buxheti i Ministrisë së Infrastrukturës më 9 tetor 2020.