Kosovari dëbohet nga Zvicra, nuk donte të punonte

Këtë vendim e ka marrë Gjykata Federale duke marrë parasysh refuzimin e kosovarit për të punuar, pastaj prirjen e tij për dhunë si dhe borxhet

Shqiptari 31 vjeçar nga Kosova, në Zvicër kishte ardhur në vitin 2005, përmes martesës me një kosovare e cila jetonte në këtë vend nga mosha 12 vjeçare, gjegjësisht  nga viti 1994. Çifti ka tre fëmijë por kreu i familjes tash duhet të braktisë Zvicrën. Këtë vendim e ka marrë Gjykata Federale, duke mbrojtur interesat publike të vendit, marrë parasysh refuzimin e kosovarit për të punuar, pastaj prirjen e tij për dhunë si dhe borxhet e tij.

Në vitin 2006 ai kishte kërcënuar me thikë dhe e kishte lënduar lehtë shefen e tij të punës. Përveç kësaj, kosovari kishte sulmuar fizikisht disa herë në javë bashkëshorten, për çfarë i ishte shqiptuar nga policia dëbimi nga banesa e përbashkët. Për shkak të gjelozisë së sëmurë të tij, bashkëshortja ishte detyruar ta braktiste punën kështu që tash një kohë të gjatë ajo ka mbetur e papunë.

Përveç faktit se gjatë qëndrimit nëntëvjeçar në Zvicër pothuajse nuk ka punuar fare, ai kishte provuar të fitonte pensionin e invaliditetit. Kjo nuk i kishte shkuar përdore pasi që ishte vëzhguar, me ç`rast ishte konstatuar një diskrepancë e madhe në mes të kufizimeve fizike që kishte pretenduar se i kishte dhe aftësisë reale të tij për punë.

Në mars të vitit 2012 Enti për Migracion i Kantonit S. Gallen kishte hedhur poshtë kërkesën e tij përe vazhdimin e lejes së qëndrimit në Zvicër. Ankesa e bërë në nivel kantonal iu hedh poshtë ndërsa së fundi edhe Gjykata Federale, si shkalla më e lartë e gjyqësisë në Zvicër ka mbrojtur qëndrimin e kantonit.

Sipas vendimit të gjykatës, interesi i kosovarit për të qëndruar në Zvicër është i pakontestueshëm, për shkakun se këtu i jeton bashkëshortja dhe fëmijët. Por, për gjykatën, më shumë ka peshuar rrethana se ai në Zvicër nuk ka punuar pothuaj fare dhe ka marrë mbi 81 mijë franga ndihmë sociale. Po ashtu ai ka pasur rreth 14500 franga borxhe. Ndërsa gjendja e tij shëndetësore, sipas gjykatës, pas dy operacioneve të kryera, nuk është aq e rëndë për ta penguar të gjejë ndonjë punë.