Kosovarët, pre e mashtrimit për viza

Ka kohë që kosovarët nga dëshira e madhe për të dalë jashtë vendit, shpeshherë kanë qenë pre e mashtrimeve nga agjencitë e ndryshme dhe nga personat e caktuar, shkruan albinfo.ch.

Ofrimi i kontratave të punës në Gjermani, caktimi i terminit në ambasadat e huaja etj., janë disa nga premtimet e shumë agjencive dhe personave jokompententë.

Qindra kosovarë në dy vjetët e fundit janë raportuar për mashtrime, duke i akuzuar agjencitë e ndryshme, e po ashtu edhe personat e caktuar.

Dëshira e madhe për të ikur nga vendi, për një jetë më të mirë dhe punë me të ardhura më të larta, bënë që shumë kosovarë të besojnë në atë se çfarë u ofrohet nga persona të caktuar apo edhe agjencive që nuk janë të licencuara.

Së fundmi, një person në Skenderaj ka rënë pre i një mashtrimi.

Sipas raportit 24 orësh, i dyshuari në këmbim të një borxhi i ka ofruar ankuesit shërbime për dërgim në një vend perëndimor, por nuk e ka mbajtur premtimin.

Pas intervistimit, palët janë liruar dhe rasti procedohet në procedurë të rregullt.

“Skenderaj 27.05.2022 – 12:50. Ankuesi mashkull kosovar ka raportuar se i dyshuari mashkull kosovar ka kryer veprën penale të lartcekur. I dyshuari në këmbim të një borxhi i ka ofruar ankuesit shërbime për dërgim në një vend perëndimor, por nuk e ka mbajtur premtimin. Në lidhje me rastin është konsultuar prokurori i shtetit, i cili ka rekomanduar që pas intervistimit palët të lirohen dhe rasti të procedohet në procedurë të rregullt”, thuhet në raportin e policisë. /Albinfo.ch