Kosovare Asllani para futbollisteve të reja të Kosovës: Futbolli nuk ka gjini

Kosovare Asllani, pritet nga i pari i FFK-së Agim Ademi

Futbollistja me famë botërore, Kosovare Asllani, ka mbërritur për vizitë në Kosovë, në kuadër të shënimit të 15-vjetorit të Pavarësisë. Ajo ka ardhur nën epitetin e Ambasadores së Shpresës së Mirë të UNICEF-it, teksa në aeroportin ndërkombëtar “Adem Jashari” në Prishtinë është pritur nga presidenti Agim Ademi, bashkë me babain e Kosovares, Naset Asllani, përcjell albinfo.ch.

Kreu i FFK-së theksoi se vetë emri i Kosovares ka bërë që të prezantohet vendi ynë në mënyrën më të mirë, derisa tha se ajo është shndërruar në model për vajzat dhe gratë kosovare, por jo vetëm, falë paraqitjeve të saj dinjitoze në fanellën e Real Madridit, Milanit dhe kombëtares së Suedisë.

Ademi duke ia dhuruar figurën e ‘Hyjneshës në Fron’ theksoi se Kosovarja është një ‘Hyjneshë Futbolli’ dhe si e tillë është shembull për t’u ndjekur nga vajzat e reja kosovare.

Po ashtu, presidenti Ademi e nderoi futbollisten me karrierë të bujshme edhe me fanellën e kombëtares së Kosovës, duke shprehur shpresën se pas përfundimit të karrierës ajo do t’i hyjë zejes së trajneres dhe në të ardhmen kontributin e saj ta japë në rolin e përzgjedhëses së Kosovës.

Nga ana e saj, Kosovare Asllani shprehu mirënjohjen e saj për presidentin Ademi dhe FFK-në për mikpritjen e ngrohtë në këtë ditë të veçantë, duke i uruar atij dhe tërë popullit Ditën e Pavarësisë së Kosovës. Ajo theksoi se është shumë e lidhur me Kosovën dhe shprehu dëshirën që ndeshja përmbyllëse e karrierës të jetë pikërisht ajo ndërmjet Kosovës dhe Suedisë, për çka presidenti Ademi i premtoi se kurdo që vjen ajo ditë, FFK do të jetë e gatshme të organizojë një ndeshje të tillë.

---