Kosova, vend i pasigurt për investime

Zhvillimet e fundit politike në vend kanë treguar se Kosova është një vend i pasigurt për të investuar, thonë ekonomistët

Analistët e ekonomisë thonë se zhvillimet e fundit politike në vend kanë treguar se Kosova është një vend i pasigurt për të investuar, raporton Radio Evropa e Lirë.

Niveli i ulët i investimeve të huaja të drejtpërdrejta, sipas tyre, paraqet rrezik për zhvillimin ekonomik në të ardhmen.

Analistja për çështje ekonomike, Artane Rizvanolli, konsideron se çdo ndryshim negativ ekonomik dhe politik, është shenjë e një jostabiliteti të një vendi dhe, si i tillë, ndikon në ardhjen e investitorëve të huaj. Ky vit në Kosovë kishte filluar me një varg problemesh. Buxheti i vitit 2011, i cili ishte dashur të miratohej në tetor i vitit të kaluar, është miratuar gjatë kësaj jave.

Ndërkaq, në bazë të një studimi të Odës Ekonomike Amerikane të realizuar me 49 kompani të huaja që operojnë në rajonin Evropës Juglindore, e që nuk janë të pranishme në Kosovë, thuhet se 60 për qind e kompanive kanë njohuri mesatare për ambientin afarist në Kosovë, ndërsa 30 për qind nuk kanë aspak njohuri për këtë ambient.

Me gjithë interesimin e kompanive të huaja për të investuar në Kosovë, në raport thuhet se investitorët potencialë, që janë duke hezituar, theksojnë përmirësimin e mjedisit ligjor dhe luftimin e burokracisë.

Udhëheqësi i Institutit për Hulumtime dhe Analiza të Politikave Ekonomike, Isa Mulaj, thotë se pa përmirësimin e kësaj gjendjeje, investime të huaja nuk do të mund të ketë në Kosovë.

Në raportet e organizatave vendore dhe ndërkombëtare thuhet se në vitet e fundit, investimet e huaja kanë pësuar rënie të vazhdueshme në Kosovë.