Kosova nis hartimin e Planit të Veprimit për Strategjinë e Sigurisë Kibernetike 2026-2027

Punëtoria dyditore do të përcaktojë prioritetet për forcimin e sigurisë kibernetike dhe zbatimin e mëtejshëm të strategjisë.

Ministria e Digjitalizimit dhe Administratës Publike ka nisur punëtorinë dyditore për hartimin e Planit të Veprimit të Strategjisë së Sigurisë Kibernetike 2026-2027, me mbështetjen e LuxDev, përcjell albinfo.ch.

Në hapje të punimeve, ministri Lulëzon Jagxhiu tha se Strategjia e Sigurisë Kibernetike, e miratuar në vitin 2023, mbetet dokumenti kryesor për zhvillimin e kësaj fushe. Sipas tij, rreth 66 për qind e aktiviteteve të planifikuara janë zbatuar plotësisht ose pjesërisht.

Ai theksoi se zhvillimet e shpejta teknologjike, përfshirë Inteligjencën Artificiale, kërkojnë koordinim më të madh institucional dhe planifikim afatgjatë për mbrojtjen e hapësirës digjitale.

Gjatë punëtorisë do të vlerësohet progresi i deritanishëm i strategjisë dhe do të përcaktohen prioritetet për periudhën 2026-2027. Ndërkaq, në fillim të vitit të ardhshëm pritet të nisë edhe hartimi i Strategjisë së re të Sigurisë Kibernetike.

---