Kosova me më shumti punësime në rajon

Vendi kryesues në rajon sa i përket punësimit është Kosova, që ka një rritje prej 9,2 për qind, ndjekur nga Serbia (4,3 për qind), Mali i Zi (3,5 për qind), Shqipëria (3,4 për qind), Maqedonia (2,7 për qind) dhe Bosnje Hercegovina (1,9 për qind)

Ilustrim

Rritja e punësimit prej 3,9 për qind gjatë vitit të fundit ka sjellë hapjen e 231,000 vendeve të reja të punës në gjashtë vendet e Ballkanit Perëndimor.

Kjo sipas raportit “Prirjet e Tregut të Punës në Ballkanin Perëndimor 2018” të bërë publik nga Banka Botërore dhe Instituti për Studime Ekonomike Ndërkombëtare Vjenë (WIIW), raporton “RTV 21”.

Shkalla e papunësisë ka pësuar gjithashtu rënie nga 18,6 për qind në 16,2 për qind, duke arritur nivele të ulëta historike në disa vende.

Vendi kryesues në rajon sa i përket punësimit është Kosova, që ka një rritje prej 9,2 për qind, ndjekur nga Serbia (4,3 për qind), Mali i Zi (3,5 për qind), Shqipëria (3,4 për qind), Maqedonia (2,7 për qind) dhe Bosnje Hercegovina (1,9 për qind), përcjell albinfo.ch.

Me gjithë progresin e bërë, shkalla e ulët e veprimtarisë, sidomos ndër gra dhe të rinj, kombinuar me shkallën e lartë të papunësisë afatgjatë dhe mbizotërimin e punësimit informal, vijojnë të paraqesin sfida për rritjen e qëndrueshme ekonomike në rajon.

Papunësia e të rinjve në nivelin e 37,6 për qind është një sfidë themelore për rajonin.

Megjithatë, kjo shifër ka pësuar zbritje nga viti i i fundit dhe thuajse çdo vend në rajon po përjeton nivelet më të ulëta të papunësisë së të rinjve që prej vitit 2010.

Niveli në vende të ndryshme ndryshon nga 29 në Malin e Zi dhe Serbi, në më shumë se 50 për qind në Kosovë.

Sipas raportit, mund të jetë e vështirë për të rinjtë që shkëputen për periudha të gjata nga punësimi apo arsimi, të integrohen përsëri në tregun e punës.

Ata përballen edhe me hendek në paga, duke marrë deri në 20 për qind më pak se ata që janë punësuar më herët.

Raporti gjithashtu thekson se shkalla e punësimit të grave është në rritje, por këto nivele janë akoma të ulëta krahasuar me standardet evropiane.

Shkalla e punësimit të grave në rajon është 43,2 për qind dhe ndryshon nga një përqindje e ulët prej 13,1 për qind në Kosovë në përqindjen e lartë prej 52,3 për qind në Serbi.

Hendeku gjinor ka shënuar gjithashtu përmirësim që prej vitit 2010, duke çuan në ngushtim nga 28,9 për qind në Kosovë në 9,8 pikë përqindjeje në Malin e Zi.