Kosova i merr edhe një futbollist Zvicrës

Florent Hadërgjonaj ka vendosur të luajë për Kombëtaren e Kosovës në futboll.

Lajmin e ka bërë të ditur vetë Hadërgjonaj. Ai në një postim në Facebook ka thënë se tash do ta veshë fanellën më të bukur në botë, transmetin albinfo.ch.

Hadërgjonaj deri tash ka luajtur për të gjitha grupmoshat e kombëtares së Zvicrës.
Por ka thënë se tash ka ardhur momenti i duhur për të luajtur për vendlindjen.

“Përshëndetje, të dashur miq. Dua t’ju njoftoj se tani sapo kam marrë pasaportën e Kosovës dhe jam gati të luaj me fanellën më të bukur në botë. Dëshira ime gjithmonë ka qenë të luaj për vendlindjen time, mirëpo është dashur të vijë momenti i duhur. Jam grumbulluar edhe nga Zvicra nga të gjitha grupmoshat deri në ekipin e parë. Nga tani, unë Florent Hadergjonaj jam një Dardan plus për trajnerin Bernard Challandes dhe do të jap gjithmonë maksimumin për Kosovën tonë”, ka shkruar ai.