Kosova bëhet qendër prodhimi për robotë ushtarakë

Kompania Stridar Kosovo, në bashkëpunim me partnerin amerikan Stridar Inc., ka prezantuar zyrtarisht platformën tokësore pa pilot (UGV) SideRunner, duke shënuar njëkohësisht fillimin e prodhimit të saj në Kosovë.

Ceremonia e prezantimit u mbajt më 30 qershor në Ambasadën e Shteteve të Bashkuara në Prishtinë, në kuadër të aktiviteteve për shënimin e 250-vjetorit të pavarësisë së SHBA-së, të organizuara nën emrin Freedom250.

Platforma SideRunner është fryt i bashkëpunimit ndërmjet Stridar Inc. dhe Stridar Kosovo, me synimin që Kosova të shndërrohet në një qendër të rëndësishme për prodhimin dhe eksportin e kësaj teknologjie drejt tregjeve evropiane, amerikane, të Lindjes së Mesme dhe vendeve të tjera.

Sipas kompanisë, sistemi është zhvilluar dhe përmirësuar vazhdimisht në bazë të përvojave të njësive ukrainase dhe përdoruesve të tjerë ndërkombëtarë. Gjithashtu, ai është testuar në bashkëpunim me Ushtrinë e Shteteve të Bashkuara për të përmbushur kërkesat e misioneve moderne.

SideRunner është projektuar si një platformë me përdorim të dyfishtë, e destinuar për forcat e armatosura, policinë, agjencitë e sigurisë, njësitë speciale, reagimin ndaj emergjencave, mbrojtjen e infrastrukturës kritike, inspektimet industriale, si dhe operacionet e kërkim-shpëtimit.

Para prezantimit zyrtar, objektet e Stridar Kosovo u vizituan nga ministri i Mbrojtjes i Kosovës, i shoqëruar nga përfaqësues ushtarakë të Ambasadës së SHBA-së. Gjatë vizitës, delegacioni u njoh me kapacitetet prodhuese të kompanisë dhe me karakteristikat e platformës SideRunner, ndërsa u shpreh mbështetje për zhvillimin e industrisë së mbrojtjes dhe gatishmëri për bashkëpunim në të ardhmen.

Nisja e prodhimit të SideRunner konsiderohet një zhvillim i rëndësishëm për industrinë e mbrojtjes në Kosovë, pasi vendi tashmë përfshihet jo vetëm në përdorimin, por edhe në projektimin, prodhimin dhe eksportimin e teknologjive të avancuara. Projekti pritet të ndikojë në rritjen e kapaciteteve prodhuese vendore dhe në forcimin e pozitës së Kosovës në tregun ndërkombëtar të teknologjive të mbrojtjes.