KDI: Deputetët e Kuvendit t’i drejtohen Kushtetueses, ka tejkaluar rrafshi i mosmarrëveshjeve politike

Instituti Demokratik i Kosovës e ka konsideruar absurde dhe të papranueshme situatën e krijuar rreth konstituimit të Kuvendit, duke vlerësuar se afati detyrues 30-ditor ka përfunduar dhe se Lëvizja Vetëvendosje nuk e ushtroi përgjegjësinë ekskluzive për ta propozuar kandidatin për kryeparlamentar.

Sipas KDI-së, Lëvizja Vetëvendosje “me vetëdije” po e vazhdon “bllokadën institucionale”.

“Kjo situatë tashmë e ka tejkaluar rrafshin e mosmarrëveshjes politike ndërmjet partive parlamentare. Skadimi i afatit pa konstituimin e Kuvendit ka krijuar një çështje të drejtpërdrejtë kushtetuese për vlefshmërinë e procedurës së mëtejshme. Një kandidaturë e paraqitur me vonesë, një ndërprerje e re 48-orëshe apo një marrëveshje eventuale politike nuk mund t’i fshijnë vetvetiu pasojat e mosveprimit brenda afatit”, thuhet në komunikatë, transmeton albinfo.ch.

Tutje, KDI-ja ka deklaruar se së paku dhjetë deputetë duhet t’i referohen menjëherë Gjykatës Kushtetuese me vendimet dhe veprimet e ndërmarra pas skadimit të afatit duke i kërkuar disa përgjigje.

“Nëse mosushtrimi brenda afatit i së drejtës së propozimit e ka shteruar mandatin e kësaj përbërjeje për përfundimin e procesit konstitues; çfarë vlefshmërie juridike kanë veprimet e ndërmarra pas skadimit të afatit; dhe cila procedurë kushtetuese duhet të ndiqet më tej, përfshirë hapjen e rrugës për zgjedhje të reja”, thonë pyetjet që sipas KDI-së duhet të dërgohen në Kushtetuese.