Kapen me fidane kanabisi: shqiptari dhe zvicerani thonë se janë domate!

Policëve u thanë se bëhej fjalë për fidanë domatesh, por ata shumë shpejtë e patën të qartë se në kutitë e gjetura kishte rrënjë kanabisi

Policia federale e Gjermanisë ka arrestuar të martën një shqiptar dhe një zviceran pasi që në makinën e tyre ka gjetur 11 kuti me mbi 700 fidanë të kanabisit.

Dy të arrestuarit hetohen për shkelje të ligjit mbi narkotikët dhe ndodhen në burgun për hetime.

Policët kishin ndaluar makinën me targa shqiptare. Të dy udhëtarët, 27 gjegjësisht 26 vjeçarë i kishin në rregull dokumentet e udhëtimit. Por kur policia kontrolloi bagazhin e tyre, ajo pati çfarë të shohë: në 11 kuti kartoni ishin paketuar nga 70 fidanë të kanabisit. Udhëtari zviceran u tha policëve se bëhej fjalë për fidanë domatesh, por ata shumë shpejtë e patën të qartë se në kutitë e gjetura kishte rrënjë kanabisi, shkruan wochenblatt.de.  Kjo u vërtetua pastaj edhe nga doganierët, të cilët e konfiskuan mallin.

Pos ndjekjes penale për narkotikë që i kap të dytë, shtetasi shqiptar akuzohet edhe për ngasje të makinës nën ndikimin e drogës, që u konstatua nga një testim i bërë.