Ka plaçkitur bankën, kosovari dorëzohet vullnetarisht në burg

Ai ka dëgjuar këshillat e autoriteteve zvicerane të ndjekjes dhe është kthyer vullnetarisht në Zvicër.

Një kosovar 26 vjeç, kishte plaçkitur, i pa maskuar, në shtator të vitit 2012 një bankë në Murgenthal të kantonit Aargau. Menjëherë pas kësaj, personi, i cili jetonte në Bernë, kishte ikur në Kosovë.

Por organet ndjekëse të Zvicrës kishin mjaft indikacione për autorin e veprës, përfshirë edhe fotografi të bëra nga kamera e bankës.

Ato e kishin kontaktuar në Kosovë duke i rekomanduar që të kthehet në Zvicër dhe t`i nënshtrohet ndjekjes penale, njofton policia kantonale e Aargaut. Personi në fjalë ka dëgjuar këshillat dhe është kthyer vullnetarisht në Zvicër.

Në Aeroportin e Cyrihut ai është arrestuar nga policia dhe i është dorëzuar prokurorisë publike në Zofingen-Kulm. Përkohësisht kosovari po mbahet për tre muaj në paraburgim.