Jo tërheqjes nga kërkesa për hyrje në BE

Me shumicë bindëse votash 33 me 8, i rekomandohet Qeverisë federale që të mos tërheqë kërkesën në fjalë

Dhoma e kantoneve ka votuar kundër mocionit të deputetit të SVP, Reimann që Zvicra të tërheq kërkesën e bërë për anëtarësim në Bashkimin Evropian. Kërkesa në fjalë ishte bërë në vitin 1992 dhe që nga ajo kohë konsiderohej si “e ngrirë”, shkruan nzz.ch.

Me këtë vendim, i cili është marrë me shumicë bindëse votash 33 me 8, i rekomandohet Qeverisë federale që të mos tërheqë kërkesën në fjalë.

Sipas deputetit Reimann hyrja e Zvicrës në Bashkimin Evropian aktualisht nuk gëzon përkrahjen e popullit zviceran. Për këtë arsye, sipas tij, Zvicra duhet të punojë edhe më tutje vetëm në rrafshin bilateral me vendet e BE-së.

Por, mocioni i Reimann-it  gjeti mbështetje pothuajse vetëm te deputetët e partisë së tij. Të tjerët, duke kundërshtuar, theksuan se një kërkesë e tillë nuk do të prodhonte ndonjë efekt por vetëm sa do të çrregullonte marrëdhëniet me BE-në.