Iniciativa “RASA” edhe zyrtarisht shkon në votim

Kjo iniciativë kërkon që teksti i iniciativës së SVP-së kundër migracionit masiv, e cila qe votuar më 9 shkurt 2014, të hiqet sërish nga kushtetuta e vendit

„RASA“ (shkurtesë për: Raus aus dem Sackgasse ose: Jashtë nga qorrsokaku) siç quhet iniciativa më e re popullore në nivel nacional, përfundimisht do të dalë në votim. Ajo ka përmbushur të gjitha kriteret që kërkohen për një iniciativë që ajo të mund të hidhet në procesin e votimit.

Këtë e ka konfirmuar të premten Zyra Federale kompetente për pranimin e iniciativave, njofton srf.ch. Ajo ka deklaruar se RASA i është dorëzuar edhe në mënyrë formale zyrës në fjalë.

Kjo iniciativë kërkon që teksti i iniciativës së SVP-së kundër migracionit masiv, e cila qe votuar më 9 shkurt 2014, të hiqet sërish nga kushtetuta e vendit.

Siç dihet, në atë tekst kërkohej kufizimi i ardhjes së të huajve të BE-së në Zvicër, ose vendosja e kontingjenteve. Në këtë mënyrë, jetësimi i asaj iniciative do të rrezikojë marrëveshjet bilaterale të Zvicrës me BE-në. Ndërsa synimi i RASA-s është pikërisht shpëtimi i këtyre marëveshjeve.

Prandaj, në tekstin e saj veç tjerash thuhet se ajo do të heqë dorë nga mbajtja e referendumit në rast se zbatimi i iniciativës kundër migracionit masiv nuk i rrezikon bilateralet.