Iniciativa “Jo 10 milionëve” mund të shkaktojë kolona të mëdha trafiku në Zvicër

Një studim paralajmëron se kufizimi i migrimit dhe largimi nga Schengeni mund të sjellin pritje të gjata në kufij dhe bllokim të qarkullimit në rajonet kufitare

Një studim i realizuar nga instituti kërkimor Ecoplan ka paralajmëruar për pasoja të mëdha në trafikun rrugor në rast se Zvicra largohet nga zona Schengen dhe heq dorë nga marrëveshja për lëvizjen e lirë të personave, përcjell albinfo.ch.

Sipas raportit, ky skenar mund të ndodhë nëse miratohet iniciativa e së djathtës ekstreme “Jo 10 milionëve”, e cila synon kufizimin e imigracionit në Zvicër dhe do të hidhet në referendum më 14 qershor.

Si pasojë e mundshme, kontrollet kufitare me shtetet fqinje mund të rikthehen si praktikë e përditshme.

Aktualisht, më shumë se 400 mijë punëtorë ndërkufitarë udhëtojnë çdo ditë drejt dhe nga Zvicra, kryesisht në rajonet e Gjenevës, Ticinos dhe Bazelit.

Studimi thekson se edhe kontrollet e moderuara kufitare mund të krijojnë kolona trafiku që shtrihen për kilometra të tërë në këto zona. Gjatë orëve të pikut, pritjet në pikat kufitare mund të zgjasin më shumë se një orë, ndërsa bllokimet mund të ndikojnë edhe në zonat urbane përreth. /Albinfo.ch

---