Infantino nuk heq dorë nga ideja për një Botëror me 64 kombëtare

Ai theksoi se FIFA dëshiron t'u japë më shumë vendeve mundësinë për të ëndërruar dhe për të marrë pjesë në skenën më të madhe të futbollit botëror

Presidenti i FIFA-s, Gianni Infantino, ka ritheksuar se ideja për zgjerimin e Kupës së Botës në 64 kombëtare do të shqyrtohet seriozisht për edicionin jubilar të vitit 2030.

Pas suksesit të formatit të ri me 48 ekipe në Botërorin 2026, Infantino tha se përfaqësimi më i madh i shteteve nga të gjitha kontinentet ka rritur nivelin e garës dhe ka dëshmuar se kombëtaret më të vogla mund të jenë konkurruese.

Ai theksoi se FIFA dëshiron t’u japë më shumë vendeve mundësinë për të ëndërruar dhe për të marrë pjesë në skenën më të madhe të futbollit botëror, transmeton albinfo.ch.

Sipas propozimit, një Botëror me 64 kombëtare do të zhvillohej me 16 grupe nga katër skuadra, ndërsa numri i ndeshjeve do të rritej në 128. Një format i tillë do të eliminonte nevojën që ekipet e vendit të tretë të avancojnë në fazën eliminatore, pasi vetëm dy të parat e secilit grup do të kualifikoheshin.

Megjithatë, ideja vazhdon të shkaktojë debat. Kritikët argumentojnë se një zgjerim i mëtejshëm mund të ulë cilësinë sportive të turneut dhe të rëndojë edhe më shumë kalendarin ndërkombëtar, ndërsa FIFA beson se përfshirja e më shumë vendeve do të kontribuojë në zhvillimin global të futbollit. Vendimi përfundimtar pritet të diskutohet në muajt në vijim.

---