I nxehti i madh zhvendoset drejt vendeve nordike

Foto ilustrim

Vendet nordike po regjistrojnë temperatura të larta, ndërsa i nxehti ekstrem që goditi këtë javë Europën po zhvendoset drejt Veriut, duke krijuar në disa zona “netë tropikale”, njoftoi sot Instituti Meteorologjik dhe hidrologjik suedez.

Në Suedi, më konkretisht veriu i vendit është përfshirë nga vala e temperaturave ekstreme, transmeton ATSH.

Qyteti i vogël i Markusvinsa (veri) regjistroi të premten një temperaturë rekord që arriti pikun në 34,8 gradë Celsius, temperatura më e lartë e konstatuar në Suedi këtë vit.

Kjo është temperatura më e lartë e shënuar në ekstremin verior që nga viti 1945, sipas meteorologut të SMHI-së, Jon Jorpeland.

Në fillim të javës, disa zona në Suedi kanë përjetuar “netë tropikale”, ndërkohë që temperatura gjatë natës nuk ka zbritur për asnjë moment nën 20 gradë Celsius.